आमच्याविषयी

कावळे

रात्रीच्या वेळी 'इमर्जन्सी'मध्ये एका ६० वर्षीय महिलेला श्वास घेण्यास त्रास होत असल्याने रुग्णालयात आणण्यात आले. तपासणीअंती असे लक्षात आले की, रुग्णाचे ऑक्सिजन कमी झाले आहे, त्यामुळे त्यांना तातडीने ऑक्सिजन लावण्यात आले. रुग्णाला जुनाच अस्थमाचा त्रास होता आणि काही कारणास्तव औषधे बंद होती. मात्र, श्वास घेण्याच्या त्रासासोबतच त्यांच्या छातीत डाव्या बाजूला दुखत होते, त्यामुळे हृदयरोगाची तपासणी करणे आवश्यक होते. तातडीने ईसीजी (ECG) करण्यात आला आणि हृदयरोगाचे निदान झाले. लक्षणानुसार उपचार सुरू केल्यावर रुग्णाची प्रकृती सुधारू लागली. मात्र, वीजपुरवठा नियमित नसल्याने आणि रात्रभर ऑक्सिजन सुरू ठेवणे अनिवार्य असल्याने, त्यांना पुढील उपचारांसाठी गडचिरोली जिल्हा सामान्य रुग्णालयात हलवण्याचा निर्णय घेण्यात आला. तीन दिवसांच्या उपचारानंतर त्या आजींना सुट्टी मिळाली. त्या जेव्हा पुन्हा रुग्णालयात तपासणीसाठी आल्या, तेव्हा त्या स्वतःच्या पायावर चालत येत होत्या. आजींचा मुलगा अपंग आहे आणि घर रोजंदारीवर चालत असल्यामुळे त्यांना रुग्णालयात पोहोचायला उशीर झाला होता. सून कामावर गेलेली असायची, त्यामुळे आपला त्रास कोणाला आणि किती सांगायचा, या विवंचनेतून त्यांनी आजार अंगावर काढला होता. "तुम्ही वेळेत निदान करून मला रुग्णालयात पोहोचवले, म्हणूनच माझे प्राण वाचले," अशा शब्दांत त्यांनी कृतज्ञता व्यक्त केली. "मी जर दगावली असती, तर माझ्या नावावर मंजूर झालेल्या 'घरकुल' योजनेचे पैसे उचलता आले नसते आणि माझ्या मुलाचे घराचे स्वप्न अपूर्ण राहिले असते," ही भीती त्यांना वारंवार सतावत होती. आता त्यांचे घर पूर्ण झाले असून त्यांची प्रकृतीही उत्तम आहे. दर महिन्याला औषधे नेण्यासाठी त्या जेव्हा रुग्णालयात येतात, तेव्हा मनाला खूप आनंद होतो.