सोबत फाउंडेशन चंद्रपूर

वैनगंगेच्या पश्चिम तीरावर वसलेले हे गाव सावली आणि ब्रह्मपुरी वनपरिक्षेत्रात येते. मुख्यत्वे धान पिकावर अवलंबून असलेले इथले जनजीवन अत्यंत अल्पभूधारक आहे. धान पिकास योग्य भाव नसल्याने, रोजीरोटीसाठी इथल्या नागरिकांना वर्षातील बहुतांश काळ स्थलांतर करावे लागते.

जिल्हा परिषदेच्या दोन प्राथमिक आरोग्य केंद्रांव्यतिरिक्त परिसरात कोणतीही खासगी किंवा तत्सम आरोग्य व्यवस्था उपलब्ध नाही. परिणामी, लोकांना आजही वैदू तसेच बोगस डॉक्टरांवर अवलंबून राहावे लागते. वाघ व इतर वन्यप्राण्यांची दहशत आणि वाहतुकीच्या तुटपुंज्या सोयींमुळे, दिवसा व सायंकाळी प्रवास करणे अत्यंत अवघड असते.

स्थलांतरामुळे कुटुंब आणि समाजव्यवस्था ढासळत असून, त्याचे दूरगामी परिणाम नागरिकांच्या जीवनावर होत आहेत. यातूनच व्यसनाधीनता, मधूनच शाळा सोडणे (गळती), गुन्हेगारी, बालविवाह, कुमारवयीन मातांचे प्रश्न, नैराश्य आणि मानसिक अस्थैर्य यांसारख्या गंभीर समस्या निर्माण होत आहेत.

‘जाणीव रुग्णालय’ या सर्व प्रतिकूल परिस्थितीत रुग्णसेवेचे व्रत घेऊन मागील साडेचार वर्षांपासून उभे आहे. सावली, ब्रह्मपुरी व सिंदेवाही तालुक्यातील ५० गावांसाठी ‘संपूर्ण आरोग्य’ ही संकल्पना प्रत्यक्षात उतरवण्यासाठी हे रुग्णालय कृतीशील असून सदैव कटिबद्ध आहे.